Jos sie et maksa velkaa sie saatat saaja maksohuomautuksen

Jos sulla oon velka jotako sie et maksa sie saatat saaja maksohuomautuksen – elikkä pripun jotako sitä useasti kuttuthaan. Se oon kretittitietoyritykset jokka huolehtivat maksohuomautuksista. Se oon kansa niitten työ johonka sie käänyt jos sulla oon kysymyksiä mikä oon aiheuttannu vissin maksohuomautuksen.

Miksis sie saatat saaja maksohuomautuksen?

Ko sulla oon velka jotako sie et maksa niin se joka halvaa makson saattaa ottaa apua Kruunufoutilta. Vähän kertaa sinun velka rekistreerathaan meän rekisterhiin. Silloin kretittitietoyritykset saattavat noutaa sen informasuunin meiltä ja se merkittee ette sie olet saanu maksohuomautuksen.

Ko oon kyse privattihenkilöistä jokka ei ole elinkeinoyrittäjät, met emmä jätä ulos tietoa velasta ylheisessä asiassa, niin sanotuissa veloissa jokka koskevat esimerkiksi maksamattomia veroja, sakkoja elikkä elatustukea, ennen ko maksoaika (avi-aika) oon menny ulos, ja velka vieläki oon maksamatta. Se merkittee ette privattihenkilöilä oon kaks viikkoa aikaa ette maksaa ennen ko esimerkiksi verovelka aiheuttaa maksohuomautuksen.

Milläs sie tiät jos sulla oon huomautus?

Sie saatat helpola ottaa selvile jos sulla oon huomautus ottamalla yhtheyttä kretittitietoyrityksen kansa.

Met emmä saata vastata sinun kysymykshiin maksohuomautuksista. Se johtuu siittä ette maksohuomautusta saattaa aiheuttaa tapahtumat jonka kansa Kruununfoutila ei ole tekemistä.

Kukas huomautuksen ottaa pois?

Se oon kretittitietoyritykset jokka ottavat pois sinun huomautuksen.